صباح الخير، على الورد اللي..

فتّح..
ع الرصاص الحيّ..
فوّت رقبته ملليمتر بعيد
ع الدمّ..
متشعّب على الأسفلت
بيلف من شارع لشارع
للجدار للشاشة للشبابيك..
خيط ممدود
وع العدرا
بتتجلى ف سحاب الغاز
للخايف
الداخل بطوبة ف إيد
ع اللقطة، للملايين
الزاحفة المعجزة
تتلمّ ف البرواز
وع الشهدا،
وشوشهم: ماركة
للورد الإزاز.

 

الورد فتّح ..
ع المعارك
فقرة
فـ فاصل التوك شو
ع الدبح في الاستاد
منقول له بث مباشر
الورد دخل الجناين
كماين
أول وتالت وعاشر
وسلمه الشيخ
والمرابي
ضمان لصوت العشاير
الورد شاف الدبايح
ماشية لساحات الدبح
تهتف ورا الجزار
الورد شاف الورود
في القبر
من غير مزار
والموتى
فوق الكراسي
متكللين بالغار.

 

الورد فتّح
ع الجثث
مفروشة ع الكورنيش
والشعب ضد الـ..
فراغ
والوردة ضد الجيش
مدهوسة بالبيادات
ع المؤتمر ميري
المتحدث/القاتل
يفحص ورود البنات
ع الناس، تكذّب عيالها
وتصدق البيانات.

 

الورد شاف وشّه
بعين واحدة
ودبلت تحت جلده
بلية الخرطوش
الورد شافكم
كلكم
فجأة
عرف اللي كان حيموت
نفسه
مايعرفهوش..

 

الورد فتّح
بس مش مبتسم
الورد فتح
مش عشان يترسم
في الفازة فوق الرفّ
الورد سام..
م الدمّ والغاز والألم
والقرف..
الورد ده ضدكم
الورد حيبيدكم..
حيهدّ دولتكم، لو فوقه تتدمر
تحت الركام والعفن
جدره حيفضل
حيّ
جدره حيفضل مُرّ..

581 total views, 2 views today