اركبي المترو وتعالي
الناس هنا كِتروا
ومفيش ف الناس
مكان يتراح
لا جنينة ولا دكّة
من خطوتين فيهم
أنهج من السكّة
من خطوتين بينهم
يملا العفار وشّي
واكون اتهنت
بكلامهم الأسمنت
وخيالهم الأسمنت
وعينيهم الأسمنت
أمشي يقابلني ألف حاجز ..ألف
لجنة شعبية
بيفتشوني كل تمشية
بيفشتوا النية
وبيفحصوا التصريح
جواهم الدخان غبي
وتقيل
أمشي ما بينهم
يعلى صوت نَفَسي
حتى أنا نفْسي
مش لاقي فيّ ممر
نهرب فيه..

اركبي المترو وتعالي..
لسه فيه خضرة ف كلامك
واسعة تحت الشمس
نمشي فيها لحد أول ناس..
نقابلها..فتغيّم
قابليني قبل ما يقفلوا الشارع
والدبابات تترصّ
وتخيّم..
قابليني بعد الناس..
نقعد ونتكلم..
آخد نفس
وأحكيلك الموضوع..

955 total views, 2 views today