يا ريحة المدارس
يا كام صفحة واجب
يا مين اللي حاضر
و مين اللي غايب
يا جلاد و دايب
عليه اسمي كامل
و تحته:
حساب أو تاريخ أو علوم
يا ريحة الهدوم
اللي دايما رمادي
زمان كنت اقوم
و نفسي في يوم كله حصة موسيقى
و هند أخت مريم
تغني قصادي
يا بابي الموارب
على الفصل فاضي
زمان كنتي فجأة
تمري في بالي
فافكر في واجب قديم ماتعملش
و حوش اللي شجره
من البرد كشّ
و دكة
عليها مشخبط وماضي
و كاتب قصايد
لهند أخت مريم
و مكتوبلي تحت القصايد شتيمة
فاخانق في كل العيال اللئيمة
و اروّح
واقول كنت بلعب خناقة
يا بابيونة
ماسكة بأستك فـ ياقة
و كام زمزمية
و كام (بادج) باش
لزوم الشياكة في صورة جماعي
و كان نفسي فيها
أقف جنب هند
و أمسك إيديها
فـ وقت الفلاش.

995 total views, 3 views today