أسوأ كوابيسي:
القمر
يطلع حجر داير
ومن قلبه..مابينوّرش
و يطلع ضلّي عـ الحيطة
سواد
لا يقول ولا يقدرش
و تطلع كلمتي
كلمة!
لا سرب حمام
ولا غيّة
واقول
تطلع لي مش هي ّّ
ولا أكسب في يوم نُــوبل
ولا تكسب
ولا تخسرش.

أسوأ كوابيسي..البـشر
تطلع صحيح لازم تموت
و القصر
في درجي القديم
الفاضي
بيت العنكبوت
و الشعر
تفاحة شبع
ولا دنيا
ولا ملكوت
أسوأ كوابيسي
أنا
يا دون كيشوت
و دنيا
حفص عن عاصم
وأنا وحدي،
اللي عايش وَرْش.

أسوأ كوابيسي:
السما
تطلع قزاز لبني
وبس
واخرج أموت فـ المعركة
وارجع
وانا عايش، وأخرس
أحضن الجذع اللي فاضل
يتقلب
حيّة بجرس.
وأحبها
ماتحبنيش
وألاقي فـ العلبة
مفيش
واصحى وانا فـ وسط الغيطان
واقف
ولكن،
خيش وقش.

أسوأ كوابيسي
أنام
ولا أصحي
ولا أحلمش.

1,090 total views, 3 views today