جرّبت أكون لوحدي
جرّبت أكون معاكم
لكن مش دي الحكاية.
فيه شيء غريب ف بالي
شاغلني ومش معايا
نادِهْلي ومش باشوفه
شاددني ولا مُبالي
يمكن علشان دا دايماً
حاسس بونس مريب
شبه الوشّ الغريب
شفته وماشفهتوش
زي اللفظ اللي عارفه
لكن ما عرفتهوش
ومهوّم فوق لساني
يمكن علشان دا دايماً
حاسس إني بعيد
وانا واقف ف المراية
وباحس بإني خايب
من غير أسباب كفاية
وبوشي مش سعيد
جوا الصورة الجماعي
بره اللحظة اللي فيها
وف لحظة مش ف إيدي
باصطاد أسراب غزال
قدامي
وف الخيال
يمكن علشان دا دايماً
يمكن..
أومش مهم..
يمكن مش دي الحكاية.

805 total views, 2 views today